España logrou situarse no cuarto posto do conxunto da Unión Europea en gasto público dedicado a investigación e desenvolvemento en relación co seu produto interior bruto (PIB). O estudo "Ciencia, tecnoloxía e innovación en Europa", publicado o pasado 10 de marzo por Eurostat, sinala que o gasto total realizado por todas as administracións públicas en España ascendeu ao 0,85% do PIB en 2005, o que a sitúa por riba da media da UE (0,74%). Soamente os gobernos de Finlandia, (1.03%), Francia, (0,93%) e Suecia (0,89%) realizaron un esforzo maior, segundo o estudo da oficina de estatísticas da Unión Europea. O orzamento de Estados Unidos dedicou unha cifra equivalente ao 1,06% do seu PIB ás actividades científicas e de desenvolvemento.

Antonia Mochan, voceira de Ciencia e Investigación da Comisión Europea, comentou que estes datos "confirman que España está a cumprir cos programas e compromisos en materia de investigación e desenvolvemento". Mochan di que os datos do informe revelan "o forte crecemento rexistrado polo sector público en I+D entre 2000 e 2005, a un ritmo do 15,3% anual, o dobre que a economía". Durante este mesmo período, o crecemento medio da UE foi do 3,7%.

En termos absolutos, cinco Gobernos europeos achegan o 80% do total do gasto público da UE. Alemaña encabeza esta lista con 17.221 millóns de euros, seguida de Francia (15.950), Reino Unido (12.950), Italia (10.309) e España (7.740).

Pedro Marín, director xeral da Oficina Económica do presidente do Goberno, sinalou o forte aumento do peso do gasto público en I+D en España, que pasou do 0,60% do PIB en 2000 ao 0,85% en 2005. "Estas cifras teñen un efecto de arrastre na investigación efectuada polo sector empresarial, parte da cal é financiada polas administracións públicas". Marín asegura que "cando se coñezan os datos dos dous últimos anos, se apreciará mellor o esforzo realizado".

Eurostat publicou tamén os datos do gasto global (sector público e empresarial) do conxunto da UE correspondentes a 2006. España situouse no 1,16% do PIB, aínda por debaixo da media europea (1,84%), o que indica a debilidade da I+D empresarial. Esta publicación non recolle, con todo, as últimas cifras de España, publicadas o pasado mes de novembro polo Instituto Nacional de Estadística, que fixaron o gasto en I+D en 2006 en 11.815 millóns de euros, o 1,20% do PIB e un crecemento do 16% respecto ao ano anterior. É significativo, con todo, que mentres o gasto na UE descende respecto de 2000, que alcanzou o 1,86% do PIB da UE, en España aumentou o 27% dende aquel ano.

Con este estancamento do gasto en investigación e desenvolvemento, á UE resultaralle moi difícil cumprir o obxectivo de destinar o 3% do PIB a investigación e desenvolvemento, establecido para 2010 na Estratexia de Lisboa. Un obxectivo necesario para competir cos Estados Unidos e cos países emerxentes, como China e India.