Desde a súa entrada en Arteixo Telecom no ano 2000, Global Dez, o grupo de directivos encabezados por Rafael Valcarce Baiget, foi consolidando a súa posición na compañía, á vez que esta avanzaba nos seus obxectivos de relanzamento e consolidación do negocio. En 2008, a participación de Global Dez alcanzou o 51%, tras a desinversión da sociedade de capital risco Sodiga.
O acordo de compra?venda de accións selado agora entre Gesprotel e Global Dez supón a saída do accionariado de Arteixo Telecom da primeira sociedade e a elevación da participación da segunda desde o 51% até o 71%. Intelega, pola súa banda, mantén a súa participación do 29%.
"Por primeira vez na historia de Arteixo Telecom, podemos dicir que a compañía é cento por cento galega, e isto supón un fito do que sentimos orgullosos. Estamos a demostrar que desde Galicia se pode innovar e desenvolver tecnoloxía para competir sen complexos nos mercados globais. Seguiremos traballando pola consolidación do sector ETIC galego e por impulsar na nosa comunidade autónoma un modelo económico baseado na produtividade, o valor engadido e o desenvolvemento sustentable", sinalou Rafael Valcarce, director xeral e presidente de Arteixo Telecom.